नेकपा एमालेको दोस्रो विधान महाधिवेशन नजिकिँदै गर्दा पूर्वराष्ट्रपति विद्यादेवी भण्डारीको सदस्यता विवाद चर्किँदै छ। नवौँ केन्द्रीय कमिटीले उनको सदस्यता खारेज गर्ने निर्णय गरेपछि विवाद अझ पेचिलो बनेको हो।
संस्थापन पक्ष ओली नेतृत्वमा भण्डारीलाई रोक्ने तयारीमा छ भने भण्डारी पक्ष कुनै हालतमा पछि नहट्ने अडानमा छ। ईश्वर पोखरेल, युवराज ज्ञवाली, सुरेन्द्र पाण्डेसहितका नेताहरूले भण्डारीलाई रोक्न नहुने भन्दै फरक मत तयार गरिरहेका छन्। उनीहरूले विधान महाधिवेशनमा ‘काउन्टर’ प्रस्ताव पेस गर्ने योजना बनाइरहेका छन्।
ओलीले आफ्नो प्रतिवेदनमा पूर्वराष्ट्रपति/उपराष्ट्रपतिलाई सक्रिय राजनीतिमा फर्कन नहुने व्यवस्था राख्ने तयारी गरेका छन् भने उपाध्यक्ष विष्णु पौडेलले दुई कार्यकालको सीमा र उमेर सीमा खारेज गर्ने प्रस्ताव ल्याउनेछन्।
भण्डारी पक्ष भने संविधानले कुनै प्रतिबन्ध नलगाएको भन्दै सदस्यता खोस्न नहुने तर्क गर्छ। फरक मत महाधिवेशनसम्म जाने सम्भावना देखिँदै छ। संस्थापन पक्षले सकभर फरक प्रस्ताव रोक्ने प्रयास गरे पनि, महाधिवेशनमा विवाद प्रमुख एजेण्डा बन्ने निश्चित देखिन्छ।
